అభిషేక్ శర్మ ఖాతాలో అరుదైన రికార్డు

ఇండియన్ ప్రీమియర్ లీగ్ (IPL) 2026 సీజన్‌లో సన్‌రైజర్స్ హైదరాబాద్ యువ ఓపెనర్ అభిషేక్ శర్మ సరికొత్త చరిత్ర సృష్టించాడు. చెన్నై సూపర్ కింగ్స్ తో జరిగిన మ్యాచ్‌లో కేవలం 15 బంతుల్లోనే హాఫ్ సెంచరీ పూర్తి చేసి, సన్‌రైజర్స్ తరఫున ఫాస్టెస్ట్ ఫిఫ్టీ నమోదు చేసిన బ్యాటర్‌గా నిలిచాడు. హైదరాబాద్‌లోని రాజీవ్ గాంధీ అంతర్జాతీయ స్టేడియం ఈ ఘనతకు వేదికైంది.

గతంలో ముంబై ఇండియన్స్‌పై 2024లో 16 బంతుల్లో చేసిన హాఫ్ సెంచరీ రికార్డును అభిషేక్ స్వయంగా బద్దలు కొట్టడం విశేషం. అదే సీజన్‌లో సహచర ఓపెనర్ ట్రావిస్ హెడ్ కూడా ఢిల్లీ క్యాపిటల్స్, లక్నో సూపర్ జెయింట్స్ జట్లపై రెండుసార్లు 16 బంతుల్లోనే ఈ ఫీట్ సాధించాడు.

టాస్ ఓడి బ్యాటింగ్‌కు దిగిన హైదరాబాద్ ఇన్నింగ్స్‌లో అభిషేక్ మొదట నెమ్మదిగా ప్రారంభించినా, ఆ తర్వాత దూకుడు పెంచాడు. మ్యాథ్యూ షార్ట్ వేసిన ఐదో ఓవర్‌లో ఏకంగా 25 పరుగులు పిండుకున్నాడు. ఈ ఓవర్‌లో మూడు ఫోర్లు, రెండు సిక్సర్లతో చెలరేగి తన రికార్డు ఫిఫ్టీని పూర్తి చేసుకున్నాడు.
మెరుపు ఇన్నింగ్స్ ఆడిన అభిషేక్, జేమీ ఓవర్టన్ వేసిన ఎనిమిదో ఓవర్లో పెవిలియన్‌కు చేరాడు. థర్డ్ మ్యాన్ దిశగా బంతిని పంపే ప్రయత్నంలో బంతి బ్యాట్ అంచును తాకి కీపర్ సంజూ శాంసన్ చేతిలో పడింది. శాంసన్ ఒత్తిడితో కెప్టెన్‌ను రివ్యూకు ఒప్పించగా, ఔటైనట్లు తేలింది. మొత్తం 22 బంతులు ఎదుర్కొన్న అభిషేక్ 6 ఫోర్లు, 4 సిక్సర్లతో 59 పరుగులు చేసి జట్టుకు బలమైన పునాది వేశాడు.

ఈ సీజన్‌లో అభిషేక్ అద్భుతమైన ఫామ్‌లో ఉన్నాడు. ఇప్పటికే కోల్‌కతా నైట్ రైడర్స్‌పై 21 బంతుల్లో 48, పంజాబ్ కింగ్స్‌పై 28 బంతుల్లో 74 పరుగులతో రాణించాడు. అంతేకాకుండా సన్‌రైజర్స్ తరఫున 100కు పైగా సిక్సర్లు కొట్టిన రెండో ఆటగాడిగా నిలిచాడు.